Sihlobo sam

Kwazekwakuhle kokwethu,
Yini na le ndiyibonayo ngathi yimbelukazi?
Lucwayi-cwayi madoda olunqoqho ngathi lufukamile.
Ulusu lusulungekile ngath' uhlamba ngobisi.
Untushu-ntushu ngathi ukhule ngezapholo.
Wondliwe nini na wasuka wangaka?
Uqinqwe njani na wena wasuka wangenaphoso?
Vala lo mlomo ngowokugabh' ihlazo.
Thula uthi tu ndizam' ukuqiqa?
Ze uthi ndakuphunyelwa ngumphefumlo undifake olwakh' uthando.
Ze undilinde ndilibophe elihashi ngathi linempene.

Kwekhu, ndomelezeni madoda ndihlasele.
Nal' ixhalanga lothando livel' iphango phambi kwam.
Nal' ikroti lixhaph' umhlabelo lizomelezile.
Nak' uzothile edubul' okwenkang' entwasahlobo.
Ndivike ngenxeba sele undigqibezela.
Bambelela Gqobansi mfondini kuthand' ukuthambeka.
Nak' ugweb' ixhala enikezela ngochulumanco.
Nazi ingelosi zezulu zibumbene kulomphefumlo.
Gcina intliziyo yam esifubeni sakho.
Khunubembe, sadan' isono ligwetyiw' uvalo, thina siceb' ingqaka.
Uthethil' uJotela zingachithw' intente.
Ndikholiwe okwam kufana nokubhaliweyo.
Esam isiphetho sakugqitywa nguwe.
Ndondle ngamehlo akho ndixole.
Ndegram – iyho.
                                                                             Xanti